27, జూన్ 2017, మంగళవారం

పీ.వీ. నరసింహారావు

 తెలుగు బిడ్డ, భారత దేశపు 9వ ప్రధాన మంత్రి, బహుముఖ ప్రజ్ఞాశాలి, 'Father of Indian Economic Reforms',  ఈ మహనీయుని జయంతి సందర్భంగా నా పెన్సిల్ చిత్రం ద్వార నివాళి.

26, జూన్ 2017, సోమవారం

నీతో నేను - అనునిత్యం - నా చిత్రానికి కవితలు




!!..నీతో నేను...!! (Anu Sree కవిత)

దేవుడు నాకొక పాత్రనిచ్చాడు
విజయవంతంగా,అర్థవంతంగా
పోషించమని.
అది నీ భార్యగా నా పాత్ర
నువ్వు నేను కలిసిన మన జీవితంలో
నా పాత్రని నేను ఆలోచిస్తున్నా..
నాలా ఉండడాన్ని హరించిన
నీభార్య పాత్రలో
నేనెలా విజయవంతం కావాలో తెలియట్లేదు...!!
మూడుముళ్ళ బంధంతో ఏడడుగుల చేరువలో , నీ పరిధి దాటని నాలో నేనెప్పుడో మాయమైపోయాను...!!

కనిపించని చెరసాలలో యావజ్జీవశిక్ష అనుభవించేవాళ్ళకు తప్ప అర్థం కాదు..!!
నువ్వు మంచి వాడివైతే నేను చాలా అదృష్టవంతురాలినట...!!
లేదంటే అంతా నాతలరాతేనట
నాతలరాత రాసేది బ్రహ్మ కాదు నువ్వేగా..!!

నువ్వేలాంటి వాడివైనా, నాతో నీ ప్రవర్తన ఎలా ఉన్నా, నేను సహనంగా మౌనంగా ఉంటే ఉత్తమ ఇల్లాలినేనట,
ఎదురుతిరిగితేనే వింతనట..!!

నీకు వ్యసనాలతోనో ,నీ నిర్లక్ష్యంతోనో
జరగకూడనిది ఏదైనా జరిగాతే..
నా మాంగళ్య బలం సరిగ్గా లేకేనట,
వైధవ్యం నా నుదుటిపై రాసిపెట్టుంటే నువ్వు కూడా ఏము చేయలేవట...!!

చేయాల్సిన తప్పులన్నీ చేసేస్తున్నా
ఏదో ఒకరోజు నువ్వు మారుతావని
ప్రతిరోజూ ఎదురుచూడాలట
నేను మాత్రం మారకూడదట..!!

ఏదైనా ఒకరోజు నువ్వు మారితే అదృష్టం అనుకుని వెంటనే ఖచ్చితంగా నీ సేవమొదలుపెట్టాలట..
నా జ్ఞాపకాల్లో నువ్వు చేసిన గాయాల మంటలు నన్ను కాలుస్తున్నా సరే..!!

కష్టాల కడలిని ఈదలేక మునిగిపోతుంటే
రక్షించే చేయి నీదే కావాలట
అందులో తోసింది నువ్వైనా సరే,
అదే చేయి పరాయిదైతే ఊరంతా
నాదే చర్చట...!!

నా గురించి మాట్లాడే వాళ్ళు వేరెవరో కాదు, నాదగ్గరి వాళ్ళే, నా కష్టం, నష్టం, కన్నీళ్ళు చూసిన నావాళ్ళే, రోజూ నన్ను గమనించే నా సొంతవాళ్ళే..!!
వాళ్ళందరికీ నువ్వు పెట్టిన పేరు "సమాజం"
ఆ సమాజానికి నువ్వేందుకు విలువిస్తావో కూడా తెలుసు, తప్పెవరిదైనా శిక్ష నాకేవేస్తుంది కదా మరి..!!
ఆ శిక్షకు భయపడే కదా
అందరూ నీ వశమయ్యేది..!!

అంతఃపురంలో బంగారు సీతకు కన్నీటి నీరాజనాలు పట్టినా,
అడవుల్లో సీతకి కష్టాలు తప్పలేదు కదా..
అదే సమాజం అదే భార్య పాత్ర..
బహిరంగంగా బంగారు సీతను కాను
కానీ నా అంతరంగంలో అరణ్యరోదనే
అది నువ్వు వినకున్నా,
నేను మునుగుతున్నా
నిన్ను మాత్రం సరైన తీరానికి చేర్చడమే
నా కర్తవ్యం, పుట్టినింటికి మెట్టినింటికి పేరు తెచ్చే ఉత్తమ ఇల్లాలిని కావాలిగా మరి..!!

పుట్టింటి నుండి ఇంటి పేరుని కూడా తెచ్చుకోని నా పాత్రకి న్యాయం...!!!!!

అను-----4



అనునిత్యం ।। ( అనిత్యం) (శ్రీమతి ఉమాదేవి ప్రసాదరావు జంధ్యాల గారి కవిత)
-------------------------------


అంతులేని ఆవేదన మోస్తున్నా అనునిత్యం!
ఎందరినో నాలాగే చూస్తున్నా అనునిత్యం!

ఎండిపోదు ఈ గాయం కాలమెంత కదిలినా
ఓపికగా లేపనాన్ని పూస్తున్నా అనునిత్యం!

మ్రోడులు చిగురించాయే బీడులు చమరించాయే
రసహీనపు కావ్యాన్నే రాస్తున్నా అనునిత్యం !

ఎంతదూరమో గమ్యం ? అగోచరం - అనిశ్చితం!
అయినావడివడి అడుగులు వేస్తున్నా అనునిత్యం!

ఆగడులే ఆసూర్యుడు ఆగదు ఈభూగోళం
భగవంతుని బొమ్మలాట చూస్తున్నా అనునిత్యం!

వెతకటమే కళ్ళకుపని ఎపుడోనువు వస్తావని 
శూన్యమైన తోటలోకి వెళుతున్నా అనునిత్యం!

--------------
(చిత్రం --పొన్నాడ మూర్తి గారు)పై చిత్రానికి నాగజల్


మదిభావం॥అనామిక॥
~~~~~~~~~~~~~
నాలో నాకే తెలియని అనామిక
నన్ను లాలిస్తూ బుజ్జగిస్తూ
నన్ను శూన్యంవైపు లాగేస్తూ....
పరదాల మేఘాలలో ఒరవడులు సృష్టిస్తూ
దాన్నే వయస్సన్నది
వృత్తాలనేగీస్తూ పరిధన్నది
దాటలేను దాగనివ్వదు

నాలో నాకేతెలియని అనామిక
తలొంచితాళికట్టించుకోమనంది
ఆశల పందిరికింద తలంబ్రాలఊసేలేదు
రెక్కలగుర్రం ఏదిక్కుకేగిందో ఊహేలేదు
జీవితంమాత్రం పాతాళాంలో బాటరాళ్ళు వెతుక్కుంటోంది
నాలో నాకే తెలియని అనామిక
రక్తం పంచిన బిడ్డలను
అడ్డాలుగాచూపిస్తూ ఇంకా బతకమంటుంది
ఛస్తూ బతకమంటుంది
తనకేంపోయింది
నలిగిపోతోంది నేనుకదా....
త్యాగాన్ని పెనవేసుకొని ఎదగడం నాకలవాటేకదా
నవ్వుతూ ఎదురెళ్ళమంటుంది .....
నాలో నాకేతెలియని అనామిక
రెక్కలొచ్చి బిడ్డలు,
రుణంతీరి బంధాలన్నీ దూరమైనా
నను వీడదూ,వసి వాడదూ
పసి తనపు జ్ఞాపకాలను నెమరేయమంటూ ...
నన్ను బలవంతపెట్టి
తనుమాత్రం కన్నీటి చుక్కైజారుతూ
గుండెతలపు తడుతూ,తడుపుతూనేఉంటుంది
నాలో నాకే తెలియని అనామిక
నాలో నేనే చూడని సాలభంజిక......J K
(చిత్రం Pvr Murtyబాబాయ్ గారు!!ధన్యవాదాలు బాబాయ్ )

24, జూన్ 2017, శనివారం

తలపు - కవిత

Pvr Murty గారి చిత్రం...
!!! తలపు !!!
ఒక చిరునవ్వు పూస్తుంది 
నా పెదవుల పై మల్లికలా
నీ రూపం మదిలో మెదలగానే
నీ తలపు సడి నను చేరగానే....!!
కొన్ని సాయంత్రాలు కొన్ని రాత్రులు
పంచుకున్న పచ్చని వసంతాలు
గుబాళించిన నీ మనసు పరిమళాలు
మెత్తగా నన్ను తడిమేసిన భావన
ఏకాంతంలోనూ నన్నొదలని
నీ ఆలోచనలు వదలడానికి మనసే రాని
మధుర భావనల కలవరింతలు....!!
చిలిపి చూపులతోనే నువ్వు చెప్పే
తీయని గుసగుసల సరిగమలు
మౌనంగా శ్రద్దగా ఆలకిస్తుంది
నీ ఆధీనమైన నా మది.......!!
చింతలన్నీ మరిపించే
నీ చిరు మందహాసానికి
దాసోహమైన నా వలపు తరంగం
నీ ఒడి తీరానికి చేరాలంటూ తపిస్తోంది...!!
అనుశ్రీ.....

22, జూన్ 2017, గురువారం

ఎన్ని జ్ఞాపకాలో ....ఎన్నెన్ని జ్ఞాపకాలో .... కవిత

సోదరి Velamuri Luxmi కవిత కి నా బొమ్మ
ఎన్ని జ్ఞాపకాలో ....ఎన్నెన్ని జ్ఞాపకాలో ....
వద్దు అనుకున్నా ముసురుకుని
వస్తాయి నీ జ్ఞాపకాలు ...
ఎన్నెన్ని ...ఎన్నేళ్ళ జ్ఞాపకాలు ...
ఎన్నెన్నో ..' నేను ముందు ' ...' నేను ముందు ' .....
అంటూ వస్తాయి నీ జ్ఞాపకాలు .....
నీపట్ల నాకున్న అపురూప భావం ....
ఎలా నీకు తెలిపేది ......
తలలో తురుముకున్న మల్లెలు
తెస్తున్నాయి ఏవో జ్ఞాపకాలు ....
ఆనాటి , ' నీ ' చూసీ చూడని చూపులు ....
ఆనాటి, ' నా ' భయభీత దొంగచూపులు ...
ఏవీ ......ఆ వెన్నెల మల్లెలు ....
ఏవీ ...ఆ తీయటి తలపులు .....
ఏవీ ...ఆ రాగసరాగాలు ....
నీకు జ్ఞాపకం రావా .....
నీపై నాకున్న అనురాగం .....
చెప్ప లేక పోయింది నా చిన్నిమనసు ....
కళ్ళల్లో ప్రజ్వరిల్లే నా మనో భావం ....
కళ్ళు మోయలేని ఆ అతిరేకం .....
అయినా ప్రేమకు ఒక దారి ఉండనే ఉంది .....
అదే ..ఏకాంత సేవ ....! దివ్య ప్రేమార్చన ..దివ్యనామార్చన ....
నిజమైన దివ్య ప్రేమకు ...
అవతలివారి అంగీకారం కానీ ....
సహాయం కానీ అవసరమే ఉండదు ...
కానీ ..నీ ప్రేమను పొందలేని నేను ....
ఇలాగే వున్నాను.....
నీపై ప్రేమని మరువలేని కళ్ళు .....
చెరొక బాష్పాన్ని రాల్చింది నేస్తమా .....
అవి చెక్కిలి మీదుగా జారి ....
గుండెపై నుంచి జారి ....అయ్యింది
అరచేతిలో అరవిందం ...... - Velamuri Luxmi

ఈ చిత్రానికి అనుశ్రీ రాసిన కవిత.
!!!గతం!!
గతపు వాకిలిలో జ్ఞాపకాల ముల్లు
తడిమిన ప్రతిసారీ గాయమై
వదలక వేధించే మనసుతో విభేదించి
కన్నీటి చెలిమినే ఆహ్వానిస్తున్నాయి...!!
గుండె నిండా గూడు కట్టుకున్న బాధ
మౌనగేయమై మదిలో వినిపిస్తుంటే
గొంతులేని భావాలన్నీ గోడులై
రాయలేని సొదలుగా
మనసు కాగితంపై మాసిపోని
రాతలై మిగిలిపోతున్నాయి...!!
గతానికి వర్తమానానికి మధ్య
విధిరాత రాసిన కఠిన నిజాలు
యదలోతుల నలుగులుతున్న
కల్లోల హృదయాన్ని చూపలేక
కళ్ళని కప్పేస్తున్న వెతల మేఘాలై
ఏకధాటిగా కన్నీరై కురుస్తున్నాయి....!!
అను--------

16, జూన్ 2017, శుక్రవారం

మల్లాది రామకృష్ట్న శాస్త్రి


మల్లాది రామకృష్ట్న శాస్త్రి - పెన్సిల్ చిత్రం.

తన కలం బలంతో తెలుగు సినిమా పాటలో తేనెలూరించారు మల్లాది రామకృష్ణశాస్త్రి... నేడు మల్లాది వారి జయంతి ... ఈ సందర్బంగా రామకృష్ణశాస్త్రి కవితామాధుర్యాన్ని మననం చేసుకుందాం...
మల్లాది రామకృష్ణ శాస్త్రి మాటే మధురం... ఆ మాట పాటగా మారితే అది మరింత మధురం కాక ఏమవుతుంది... చలనచిత్రసీమలో అడుగు పెట్టక ముందే తెలుగునేలపై మల్లాది రామకృష్ణశాస్త్రి రచనలు తెలుగులోని తీయదనాన్ని మరింత చేసి చూపించాయి... ఆయన కలం పలికించే మాధుర్యం కోసం తెలుగు చిత్రసీమ ఎర్రతివాచీ పరచింది... చిత్రసీమ పులకించేలా మల్లాదివారి కలం సాగింది... మధురాతి మధురాన్ని తెలుగువారికి సొంతం చేసింది... గురజాడ 'కన్యాశుల్కం' తెరరూపంలోనూ మల్లాదివారి పాట మరింత పసందుగా సాగి గిరీశం పాత్రకు సినిమా తళుకులద్దింది...
కథ ఏదయినా అందుకు అనువుగా తన కలాన్ని కదిలించడం మల్లాదివారికి బలేగా తెలుసు... అందుకే ఆయన రాసినవి కొన్ని పాటలే అయినా, అన్నిటా తనదైన బాణీ పలికించారు... ఇతరులను అనుకరించడం ఆయనకు తెలియని విద్య, ఇతరులు తనను అనుసరించేలా చేసుకోవడంలో ఆయన మిన్న... రాసి కన్నా వాసిమిన్న అని నమ్మి తెలుగు జిలుగులు కనిపించేలా మల్లాదివారి కవితాయాత్ర సాగింది... మల్లాది వారి పలుకులోని మాధుర్యం ఈ తరం వారిని సైతం ఆకర్షిస్తూనే ఉంది... ఒక్కసారి మల్లాది పాట వింటే చాలు మళ్ళీ మళ్ళీ వినాలనిపిస్తూనే ఉంటుంది...అదీ మల్లాది పాటలోని మహిమ!...
మద్రాసులో సముద్రాల రాఘవాచార్యకు అత్యంత ఆప్తుడయ్యాడు. అతడికి చాలా కాలం "ఘోస్ట్ రైటర్"గా ఉన్నాడు. 1952 వరకు ఇతడు చేసిన సినిమా రచనలలో ఇతని పేరు లేకపోవడం గమనార్హం. చిన్న కోడలు చిత్రంతో ఇతడు అజ్ఞాత వాసం వదిలి బహిరంగంగా సినీజీవితం కొనసాగించాడు. తన సొంత పేరుతో 39 చిత్రాలలో 200కు పైగా పాటలను రచించాడు. చిరంజీవులు, రేచుక్క, కన్యాశుల్కం, జయభేరి లో సూపర్ హిట్ అయిన పాటలు ఇతడు రచించినవే !
ఆంధ్ర సారస్వత క్షేతంలో పసిడి పంటలు పండించిన పుంభావ సరస్వతి కే.శే. మల్లాది రామకృష్ట్న శాస్త్రి.
(సేకరణ - ఇక్కడా అక్కడా)

ETV వారు ప్రసారం చేసే స్వరాభిషేకం కార్యక్రమం లో నేను వేసిన మల్లాది వారి చిత్రాన్ని చూపించడం గమనార్హం. అయితీ ఈ కార్యక్రమం ద్వారా కొన్ని తెలియని విషయాలు కూడా తెలుసుకున్నాను. ఈ క్రింది లింక్ క్లిక్ చేసి ఈ కార్యక్రమాన్ని చూడవచ్చు.

- పొన్నాడ మూర్తి

13, జూన్ 2017, మంగళవారం

మదిభావం ॥ఆనందహేళ॥ - మనసు -


నా పెన్సిల్ చిత్రానికి కవితలు

శ్రీమతి జ్యోతి కంచి గారి కవిత
మదిభావం ॥ఆనందహేళ॥
~~~~~~~~~~~~~~~
ఒకసారి మళ్ళీ నా ఆలోచన తట్టిలేపవా!!
వెలుగురేడు వెంపు కమలదళాలన్నీ ఆర్తిగా చూసిన ఆచూపులోని కొంత కొత్తదనాన్ని నా కనురెప్పల ముద్రిస్తావు!!
గళగీతాలన్నీ ఏకమై ఎదలో లహరీనాదాలనే చేస్తుంటే
ఆ సవ్వడి లోని చిరుమువ్వను నానవ్వులో పొదిగిస్తావు!!
సాంధ్యహారతులెత్తే తారకల మిలమిలలు మంగళమౌతుంటే
వెన్నెలనైవేద్యాలతొ నా దోసిళ్ళునింపేస్తావు!!
బడబాగ్నులన్నీ ఒక్క అనునయంతో చిప్పిల్లినట్లు
నాజీవితసాహచర్యమై అద్భుతంగా నీ కొనగోట నాచుబుకాన్నలా నీవైపు తిప్పుకుంటానంటే....
సఖుడా!!
పలుమార్లు ఇలా అలుకలు నటించగలేనా??....


శ్రీమతి అనుశ్రీ గారి కవిత
!!! మనసు !!!
నిజంగా నీ అంత ఇష్టం నీ అంత ప్రేమ
ఎవరు చూపిస్తారు నాపై
ఎవరికీ తెలుసు నేనేంటో
ఎవరికి తెలుసు నాలో అలజడెంతో....!!
మౌనంగా రోదిస్తూ నా కన్నీళ్ళని తుడుస్తూ
ఉలిక్కి పడి లేచిన ప్రతిసారి ఫరవాలేదని...
అస్తమిస్తున్న ఆశలకు ఆయువు పోస్తూ...
నన్ను కనిపెట్టుకుని నా కలలన్నీ పట్టుకుని..
తీరం చేర్చే దిశగా అడుగులు వేయిస్తూ..
నిద్రని వెలేసిన ఎన్నో రాత్రులలో
నన్ను నాకు పరిచయం చేస్తూ..
ఆవేశాన్ని అణచివేస్తూ
ఆక్రందనలని అనునయిస్తూ..
ఎన్ని వేల సార్లు మరణించావో
నన్నిలా బ్రతికించేందుకు.......!!
ఎన్ని సార్లు ముక్కలయ్యావో
నేను ఓడించిన సమయాలను తలచి....
ఎల్లలు లేని నీ ఆలోచనల సమీరాలని
నాకోసం గిరిగీసుకుని
నలుగుతూ నడిపిస్తున్న నిన్ను
నాకేమవుతావో ఎలా చెప్పను....!!
సంతోషాల ఊయలలో ఊగినపుడు
నవ్వుల జల్లై మురిసి పోతూ...
విషాదాల వేటుకి గాయపడినప్పుడు
ఓదార్పు వై సేద తీర్చుతూ....
కాలానికో మనిషిని హితులంటూ చూపితే
ఏడుస్తూ తిరస్కారాల శాపాలు భరించి..
నాతో పాటే నడిచి అలసి సొలసినా
నను వీడలేక నాతో పయనిస్తున్నావు...!!
విశ్రమించే తరుణం ఆసన్నమైనపుడు
మట్టిలో సైతం తోడొచ్చే నేస్తానివి
నాతో కలిసి అంతరించే అంతరంగానివి
పేరు అడిగితే ఏమనగలను
నాతో పాటే పుట్టిన నా మనసువననా
చూపించమంటే నాలోనే ఉన్నావని
నన్ను నాలో చూసుకుని మురిసిపోనా....!!
అనుశ్రీ...

2, జూన్ 2017, శుక్రవారం

నీ స్పర్శ కూడా భాషే




నా చిత్రానికి కవిత -  courtesy Jyothi Kanchi
మదిభావం ॥నీస్పర్శ కూడా భాషే॥
~~~~~~~~~~~~~~~~~~~~~
వెంటాడే తన స్పర్శ నానీడలో కలుస్తోంది
ఆహ్లాదమై నన్ను తాకే బంధమొకటి పెనవేస్తోంది!!
వెచ్చదనమా కాదది..బాధ్యతమోసే భరోసాతనం!!
నిరంతరం నేను నన్ను ఒంపుకునే నిండుదనం!!
నిన్నలలో నేనెవరో రేపైతే ఏమౌతానో
నీలిమబ్బులా చరించే జీవితమిది
ఏదిశకో చేరుకుంటూ చెదిరిపోతూ...
నీవొచ్చావు....
ఒద్దికగా మేఘమాలికలను ఏరికూర్చి,నన్నో వానచినుకును చేసావు
అవధులులేని అక్షరవిహంగాలివిగో ఇలా వలసవచ్చేసాయి
కొల్లేటితీరమై నేను,, నాలోనిండిన ప్రతిరేణువై నీవు !!
చెంపతాకిన చల్లగాలి..యుగళగీతాలేవీ పాడడంలేదు
పెదవిపైన మనప్రణయరాగాలసలే లేవు
జతవీడని బంధమై చివరివరకు నాచేతిలో నీచేయి
 నీ స్పర్శ కూడా భాషై మధురంగా వుంటోంది..
నీచేతి వేళ్ళతాకిడికే మరో రోజు బతకాలనివుంది...
ఒక్కటి చెప్పనా సఖుడా!!
మృత్యుంజయమంత్రమే.....మన బంధం!!
JK 2-6-17(చిత్రం--Pvr Murty బాబాయ్ గారూ....ధన్యవాదాలు బాబాయ్ )

నిరీక్షణ

"బొమ్మ నాది భావాలు మీవి" అనే శీర్షికకు  నా ఈ  చిత్రానికి బావుక ఫేస్బుక్ గ్రూప్ లో పలువురు తమ రచనలతో స్పందిస్తున్నారు. పైన ఇచ్చిన చ...