గోరింక జాడనే వెతకడం మానెలే - గజల్

నా చిత్రానికి శ్రీమతి గుడిపూడి రాధికారాణి గారు రచించిన గజల్

**ముషాయిరా గజల్**

గోరింక జాడనే వెతకడం మానెలే
గోరంత అండనే కోరడం మానెలే

మధురోహ మందార మొగ్గలా విరిసింది
ఎడబాటుతో ఎడద మండడం మానెలే

నమ్మకము కాపురపు సూత్రమని తెలిసింది
అనుమాన బీజాలు విసరడం మానెలే

ఆషాఢ మాసాన ఈ విరహమేలనో
గడియారమున ముల్లు కదలడం మానెలే

కమ్మనగు వంటకము చేదుగా తోచెనే
అధరాల మధురాలు కలవడం మానెలే

చేదోడు వాదోడు చింత తీర్చే తోడు
ఈనెలకు నాచెంత చేరడం మానెలే

గోపాలకృష్ణునికి చెలియనోయ్ రాధికని
గోధూళివేళైంది అలగడం మానెలే.

గుడిపూడి రాధికారాణి(19.9.2019)