Ammu Bammidi కవితకి నా చిత్రం. సమ్మతించిన అమ్ముకి ధన్యవాదాలు. శుభాశీస్సులు
ఏకాంత సమారాధన
( కృష్ణార్పణం ; శుభోదయం)
🌹🌹🌹🌹🌹🌹🌹🌹
గాలి తరంగాలకెంత ఇష్టమో..!
నీ చూపును భుజాలపై మోసుకుని
నేరుగా నా కళ్ళలోకి చేర్చాలని!!
ఎన్నాళ్ల తర్వాతో ఆ కలయిక!
వసంతంలా ఒక్క ఉదుటున
ఆ చూపు నన్నల్లుకోగానే..
మనసు పువ్వై విరబూస్తుంది..!
ఊపిరి ఎన్ని సార్లు ప్రవహించిందో..
ఇరు మనసుల మధ్య వారధి కట్టాలని!!
పరస్పర యోగక్షేమాల పలకరింపుల్లో
గుండె అంచును
ఎన్నిసార్లు తాకిందో సంతోషం.!
ఒకే కొమ్మకు రెండు లతలల్లుకున్నట్టు
ఒకే రేఖపై ఇరు చూపులూ ఏకమై
అప్రమేయంగా పలికిన మౌనరాగం
ఒక్క క్షణమే అయినా..
ఆజన్మాంతం సరిపడా ప్రణయకావ్యమేగా!!
చిమ్మచీకట్లో దారి చూపే
నక్షత్రాల వెలుగు.. ఆ చూపు..!
కష్టాల చీకట్లో తోడు నిలిచే
కిరణఖడ్గం ఆ చూపు!
రోజూ వేలాది కృత్రిమ నవ్వుల
పలకరింపుల కన్నా..
నీ కంటి చూపుతో జరిపే
ఏకాంత సమారాధన ఒక్కటి చాలుకదా
నా ఉనికి తెలపడానికి..!!
- ఎస్. అమ్మూ బమ్మిడి
https://www.facebook.com/share/p/8mKi2q4LBz4ETYLC/?mibextid=oFDknk
కామెంట్లు లేవు:
కామెంట్ను పోస్ట్ చేయండి