నా చిత్రానికి మిత్రుడు పొన్నాడ మురళి గారి భావ వ్యక్తీకరణ
తెలగాణ్య అగ్రగణ్య తేజము, రాజ్య పూజ్యము పీవీ
ఇల నిలిచి గెలిచిన పలు ప్రజ్ఞల పండిత ప్రతిభా జీవి !!
శిల నుండి చెక్కిన సుందర శిల్పమోలే ఖ్యాతి గాంచినావు
పలుభాషలనవలీలగ నేర్చి విశ్వమున ఘనతనొందినావు !!
విలువల రాజకీయము సల్పి మేలు పదవులెన్నో చేపట్టినావు
మలుపుల కుటిల మర్మముల కౌటిల్య కౌశలము చూపినావు !!
తలవని తలపున తలుపు తట్టిన అత్యున్నత పదవి
కలి కష్ట కాలమున చేపట్టి, హస్తిన నేలిన జగజ్జెట్టీవీవు !!
మలి సంధ్యన భరత భువినేలి మేటి పాలనందించినావు
పలు విధముల విపణి వీధుల తెరిచి విత్త విస్తరణ చేసినావు !!
అలుపెరుగక శ్రమ సలిపి ఆర్ధిక పరిపుష్టి చేకూర్చినావు
నేల నలు చెరగుల మన ఖ్యాతినినుమడింపజేసినావు !!
కలనైనా ఇల మరువదు నిను...ఓ మాన్య ధన్య చిరంజీవి
మేలిమి బంగరు వన్నెల మేటి, పాములపర్తి వెంకట నరసింహ ఠీవి !!
కామెంట్లు లేవు:
కామెంట్ను పోస్ట్ చేయండి