పంచభూతాల దాడి = కవిత

నా పెన్సిల్ చిత్రానికి మిత్రురాలు శ్రీమతి సింహాద్రి జ్యోతిర్మయి గారి కవిత

పంచభూతాల దాడి

కన్నీటికుండలు
ఎన్ని కుమ్మరించినా
మనసు అగాథం లోని
బాధల బడబాగ్ని
చల్లారటం లేదు.

అపార్థాల భూకంపాలు
ప్రేమ పునాదుల్ని కదిల్చి
అనుబంధాల మేడల్ని
కుప్పకూలుస్తున్నాయి

కనురెప్పల వాకిళ్ళు
ఎంత గట్టిగా బిగించినా
తోసుకొచ్చే సుడిగాలిలా
అలజడి దొంగ
అంతరంగంలో జొరబడి
నిద్రను కాజేస్తున్నాడు

అనంతమనుకున్న
ప్రేమకాశం
శూన్యమని
నెత్తిన పిడుగుపడ్డాకే అర్థమయ్యింది

గుండెను మండిస్తున్న
నిజమనే నిప్పు
ఆత్మశాంతి వనాలను
దావానలంలా‌ దహిస్తోంది.

పంచభూతాలు
పంచప్రాణాలపై పగబట్టి
తమలో ఐక్యం చేసుకోవాలని
ఆరాటపడుతున్నాయి.
మరి
ఈ పోరాటంలో
విజయం
ప్రకృతికో!
ప్రాణాలకో!!