దండ వంకీ యదియె దక్షిణ హస్తాన - దండ కడియాలు - పద్యాలు

.

శ్రీమతి శశికళ ఓలేటి గారి పద్యాలు చక్కని పద్యాలు  - వారి అనుమతితో ఇక్కడ పొందుపరుస్తున్నాను.

దండ వంకీ
*******
దండ ఒంకి యదియె దక్షిణ హస్తాన
ధగధగలుగ మెరయ దండి గాను.
పచ్చ,రవ్వ, కెంపు , పచ్చరించి పొదిగి
సొగసు కత్తె కెంతొ సొబగు లద్దె.
…………………………………………
అరటి దూట వంటి అందాల చేతికి
అమరె బంగరమున అర్ధ వంకి
వంక లేని వనిత వర్ఛస్సు మరిపెంచి
మురిపెముగను తొడిగె మురియ ముదిత.
……………………………………………
చేతి గాజు లెంతొ సింగార మొలుకుతూ
చేవ కూర్చె తరుణి చేతి కెంతొ
పోటికొచ్చెనదె పొళ్ళ బంగరు వంకి
కేకి బొమ్మ పెంచ, కేలు సొగసు.
……………………………………………
కలువ తూడు లవిగొ కరములు లలనవి
కోమలాంగి కేలు కోరె మగడు.
కండ లేని దండ కమరించె నాతడు
కమలజాక్షి వంకి కలికి సిరికి.
……………………………………………
వజ్రఖచిత మైన వడ్డాణమునకదె
సరిగ బోలు నట్టి సరసి ఒంకి
ఒంకరేమి లేని వొరు వరస పట్టెడ
వంక జాబిలల్లె సొంపు కూర్చె.
……………………………………………
జోడు హంస లవిగొ చూడ పతకమందు,
జాలు వారు గొలుసు జార గూడి
కాంతులీను తున్న కనకంపు ముత్యాల,
పచ్చ, కెంపు, కలిసి పసిడి ఒంకి.