————————————
ఎదను తొలిచీ మనసు దోచీ
వీడి పోవుట ఎందుకో !
అదను తెలిసీ సుధను గ్రోలగ
వచ్చిపోవుట ఎందుకో !
మొగలిపూవులు గుచ్చుకున్నా
జడను దాల్చక ఉందుమా?
బాధలోతోసేసినా , నే వాలి
పోవుట ఎందుకో !
నీవు వచ్చిన గుర్తులన్నీ
ఊపిరిని నింపేనులే
కౌగిలించీ పాత తప్పులు
తుడిపి పోవుట ఎందుకో !
మండుటెండలు వచ్చిపోవా
మంచివానకు ముందుగా
ముద్దు చేస్తూ మాయమంత్రం
వేసిపోవుట ఎందుకో !
అంత కోపం మంచులాగా
కరిగిపోదా చూడగా
ప్రేమకేగొళ్ళాన్నితీస్తూ
మురిసిపోవుట ఎందుకో !
కలతలన్నీ నీటి సుడులే
కౌగిలిస్తే ఉండునా ?
ప్రణయకలహం సహజమేనని
తేల్చి పోవుట ఎందుకో !
అలసిపోయిన ఎదల సొదలకు
ఆటవిడుపే మురిపెమూ
వేటగాడా కరుణమాలీ
కొట్టిపోవుట ఎందుకో !
ప్రేమజలధిన పడవసాగే
జంటచిలుకలు నడపగా
ఈశ్వరా ! నీ కేమి మోదము ?
ముంచి పోవుట ఎందుకో !
కోర్కెలన్నీ కూడబెట్టా
ఆరగింపును చేయగా !
వారబోసిన దేవి నిచ్చట
వదిలి పోవుట ఎందుకో !
—————————
డా. ఉమాదేవి జంధ్యాల
చిత్రం - Sri. Pvr Murty garu
కామెంట్‌లు లేవు:
కామెంట్‌ను పోస్ట్ చేయండి