నీటి కోసం - pen sketch

నా ఈ చిత్రానికి Leela Kay గారు facebook లో చక్కని కవిత అందించారు.

PVR మూర్తిగారి చిత్రం 'నీటికోసం ' పై నా చిత్ర స్పందన

నడక తాను నేర్చింది కోసుల దూరాలను

కొలవాలని కాబోలు కర్మ భూమి తానౌతూ

బ్రతుకులోని భారమంతా అడుగులలో మోస్తోంది

ఎడారంటి వట్టినేల నీటిచెలమ జాడలకై

కళతప్పిన కన్నులతో వెదుకుతోంది చుక్కచుక్క

గుక్కెడు నీళ్లంటే అమృతమే దప్పిగొన్న గొంతుకు

కడివెడు కన్నీళ్లను కనులకుండ నింపుకుంటు

కదులుతోంది వడివడిగా కడవనెత్తి కఱకునేల

కనికరము లేని మబ్బు కురవనంటు అలిగింది

కరుణలేని కరిమబ్బులు దాచినాయి వానచినుకు

పుడమిగుండె నెఱ్ఱలీని సెగలపొగలు చిమ్మింది

పాలిచ్చే పొదుగుఎండి రుధిరాలను చిందింది

పచ్చగడ్డి రుచిమరచిన పశులమంద వగచింది

గుక్కెడునీటికి గూడువిడచి మండుటెండ వెన్నెలగా

ఆశలతడి అలసిన అడుగుల లేపనముగ

బంజరంటి బతుకుబాట వ్యథ ముగియుట ఎన్నటికో !

కడసారిగ తీర్చేనని అమ్మగొంతు దాహాన్ని

పొడిబారిన గుండెలలో అశ్రుచెలమ దాచుకుంది

గుక్కెడు నీటిని గొంతులోన జారవిడచ

కన్నకొడుకు వచ్చేనా? కన్నులతడి తుడిచేనా ?

@నీలూ
మిచిగాన్
8th December 16