తెలుగు గజల్ - డా. ఉమాదేవి ప్రసాదరావు జంధ్యాల గారి సౌజన్యంతో
ఉండుండి మేఘాలు కమ్మడం చూసాను!
శోకాల జడివాన కురవడం చూసాను!
మోయలేనీబరువు- అంటోంది ప్రతిగుండె
ఆనందమను పదం తొలగడం చూసాను!
పల్లేరు కాయలను నల్లేరుగా నమ్మి
శకటమే పల్టీలు కొట్టడం చూసాను!
దుఃఖసంద్రంలోన పడవలొస్తున్నాయి
ఒడ్డుచేరగలేక ఊగడం చూసాను !
మనసుపడి గీసాడు చిత్రాన్ని పైవాడు
రంగులే ఒకటొకటి వెలవడం చూసాను !
పలుకు తేనెలు లేవు వెలుగు సోనలు లేవు
భావాలపై తెరను వేయడం చూసాను!
అందాల ఈబొమ్మ చేజారి పగిలింది !
మునిగాక సేతువును కట్టడం చూసాను!
~~~~~~~~~~~~~~~
డా. ఉమాదేవి జంధ్యాల
కామెంట్లు లేవు:
కామెంట్ను పోస్ట్ చేయండి